Mataupu i le Puipuiga mai le Fa’atautu’i o Fale Nofo

Learn about your issue

Find Legal Forms

Faitau: English
Authored By: American Samoa Legal Aid

Information

  1. Na maua e le ASLA  se fesoasoani tupe mai le Bank of America ina ia  faia ai ni fautuaga fa’aletulafono e puipui mai ai tagata ma aiga mai le fa’atautu’i o latou fale ma fanua. O se tasi o sini o le ASLA o le fa’atumauina o fale e nonofo ai aiga.
  2. O le Nonogatupe Fa’amokesi o Fale o le nonogatupe lea e mokesi i se fanua ma isi atinae i luga o le fanua e aofia ai ma fale nofo. O fanua i Amerika Samoa e mokesi ai ia aitalafu e masani ona aofia ai fanua pulea e tagata taitoatasi ma lisi o fanua faitele o aiga.  O aitalafu ia e ese mai aitalafu mo fale nofo ae leai se mokesi, aitalafu fa’apisinisi ma isi aitalafu.  
  3. O le fa’atautu’i o fale nofo o le ave lea e le faletupe o le fale ma le fanua pulea taitoatasi po’o le lisi o fanua faitele na mokesi ai le aitalafu ma fa’atau atu i se tagata e pito i maualuga lana ofo. 
  4. Fautuaga e Puipui ai mai le Fa’atautu’i o Fale Nofo:
    1. Tausisi i le maliliega e fa’atatau i lau  nonogatupe o lo’o fa’atulaga i totonu o le folafolaga  tusitutisa e totogi le aitalafu ma le mokesi. 
    2. A’o totogi lau aitalafu o le fale o lo’o iai se mokesi, afai ua matua fa’alaititia le tupe maua fa’alemasina a lou aiga pe matua sii tupe fa’aalu fa’alemasina a lou aiga, fa’afesootai le faletupe ia maua se fa’amaoniga o  le tului,  tupe totogi ma le paleni o  lau aitalafu, ma talosaga pe mafai ona sui le folafolaga tusitusia mo le totogiina o le aitalafu ina ia fa’apau’u le aofa’i e totogi fa’alemasina, tu’u atu i tua le aso mulimuli e totogi ai le aitalafu, fa’apauu le tului, tu’ufa’atasi ia nonogatupe e fia i se nonogatupe e tasi.
    3. Taumafai ia aua nei avea e le faletupe lau aitalafu i le Loia a le Faletupe aua e totogi ai e oe le tau o le loia a le faletupe e fa’aopoopo i lau aitalafu.
    4. A maua loa sau tusi mai le loia a le faletupe ua fa’aletonu lau aitalafu fa’amokesi o fale nofo, e tatau loa ona e alu e vaai sau loia pe susu mai i le ASLA e fesiligia po ua e agavaa mo fesoasoani fa’aletulafono po’o fesoasoani mai loia a le ASLA e le totogia.  O ai e agavaa i tautua a le ASLA? E fa’apefea le fa’auluina o se mataupu i le ASLA? O lea le  polokalame a le ASLA e tula’i ai le loia i tua e totogi e le ASLA mo oe? 
    5. Afai e te fia maua se fesoasoani mai le ASLA e foia ai le ave e le faletupe ma  fa’atautu’i lou fale nofo ma le fanua/lisi o le fanua, e tatau ona e tauaa’oina i le ASLA fa’amaumauga ia i  se taimi vave: kopi folafolaga tusitusia o le totogiina o le aitalafu, kopi ua resitara o le mokesi, kopi ua resitara o le fanua pulea e tagata taitoatasi, kopi ua resitara o le lisi o le fanua, kopi o le ioega tusitusia o le e pule i le fanua e mafai ona mokesi le fanua, kopi ua resitara o le fua o fanua ua mokesi, isi fa’amaumauga o le aitalafu, teuteuga poo suiga o le maliliega muamua e fa’atatau i le aitalafu ma le mokesi, maliliega e toe fa’aleleia le totogiina o le aitalafu, fa’amaumauga atoa o le aofai na totogi ma paleni o le aitalafu. 
    6. E tatau ona silafia po’o lea le mafuaaga ua fia ave ai e le faletupe le fale ma le fanua na mokesi ai le aitalafu. O le mafuaaga o le tuai ona totogi le aitalafu poo seisi mafuaaga o loo i le mokesi? E mafai e le ona le aitalafu ona fofo le fa’afitauli i le taimi ua fa’atulagaina e le mokesi e fofo ai?
    7. Lu’i Fa’asaga i le Ave ma le Fa’atautu’i o Fanua ma Fale na Mokesi:
      1. O le mokesi e le’i resitaraina.
      2. E le’i tausisi le faletupe i manaoga o loo iai i totonu o le mokesi ae le’i ave ma fa’atautu’i le fale ma le fanua. 
      3. O le fanua o loo mokesiina e le’o sa’o le fa’amatalaina i le mokesi. 
      4. O le fanua o loo mokesiina e le’o lava le fa’amatalaina i le mokesi. 
      5. O lo’o iai leisi pisinisi na muamua ona mokesiina le fanua ma le fale o loo mokesi e le faletupe.
      6. O le Fa’amaumauga o le Fa’atauina o le Fanua o loo mokesiina fa’atasi ma le fua sa’o o le fanua e le’i resitaraina. 
      7. O le lisi o le fanua faitele o loo mokesiina ma le fua sa’o o le fanua e le’i resitaraina. 
      8. E le’i ioe le ua pule i le fanua o lo’o lisi i le mokesi.
      9. O le poloaiga a le Fa’amasinoga e totogi le aitalafu ua lava lena mo le fa’amalieina o le aitalafu aua o le fa’atautu’i o le fale ma le fanua o le a leai se mea e nonofo ai le aiga.
      10. O le ofo maualalo i le Fa’aliga o le Fa’atautu’i o le Fanua ma le Fale e maualalo tele i lo le tau fa’amaketi.  
Back to top